NAGA CITY– Nagpapadagos ngunian an pigigibong imbestigasyon kan mga otoridad katakod kan nangyaring engkwentro kan duwang armadong grupo sa Sitio Nabuntugan, Brgy. Banga Caves, Ragay, Camarines Sur.
Sa nakuang impormasyon kan Bombo Radyo Naga, napag-araman na mantang pigbabagtas kan sarong L-300 van na lunad an duwa katao kan bigla ining kinompronta kan duwang dae pa nabibistong mga lalaki sa gilid kan tinampo na nagin dalan kan mainitang diskusyon.
Sa tahaw kan iwal kan duwang grupo, nag-abot naman an walong van na lunad an pokumas humenos 25 kalalakihan na armado nin manlaen laen na klase nin badil asin duman nagpuon na magriribayan nin putok.
Tulos man na nakaresponde na kapulisan alagad dae na naabutan an mga suspek na tulos nagdurulag makalihis an insidente.
Mientrastanto, narekober sa lugar kan pinangyarihan an 12 basyo nin bala kan manlaen laen na klase nin badil.
