Nasa 479.15 ektarya kan omahan sa Bicol Region, apektado kan El niño phenomenon; 526 na mga paraoma nangangaipohan nin tolos na tabang
NAGA CITY – Nagpakol na sa kabilugang 479.15 ektarya kan omahan an naapektaran kan naeeksperyensyahang El Niño Phenomenon sa parte kan Bicol Region para sa bulan kan Marso 2024.
Sa entrevista kan Bombo Radyo Naga ki Maria Cleofe Baraero, Public Information Officer kan National Irrigation Administration-Bicol sinaysay kaini na an nasambitan ng datos an gikan sa manlaen-laeng probinsya kan Rehiyong Bikol kun sain aktwal na naeeksperyensyan an labing tagtuyot.
Katakod kaini, naapektaran nin nasambitan ng weather phenomenon an nasa 148 na ektarya kan omahal sa probinsya kans Camarines Sur mantang nagpakol naman sa 250 hectares sa Albay asin 80 ektarya kan omahan sa probinsya kan Masbate.
Sigun pa sa opisyal, nagpakol naman sa nasa 526 na mga paraoma sa bilog na Bikol Region an naapektaran kan labing tagtuyot kun sain sa parte kan Camarines Sur nakapagrehistro na nin nasa 160 totally affected farmers mantang nasa 302 na paraoma man an naapektaran sa Albay asin 64 sa Masbate.
Sa huring na datos na kapot kan National Irrigation Administration Bicol para sa monitoring kan El Niño damages, nagluluwas na an Camarines Sur asin Albay an yaon na sa stress level na, boot sabihon igwa pa nin suplay kan tubig para sa mga irrigation alagad nagpakol na an water sources sa critical level.
Dugang pa kan opisyal, kaipuhan na nin augmentation pumps tanganing magbomba sa mga kanal an tubig tanganing mapasiring o mag-agos ini sa mga pigtanom na paroy orog na ta an mga ini an yaon na sa vegetative state kun sain kaipuhan na kaipuhan nin bastanteng supply kan tubig tanganing ma-sustain an pagtalubo kan mga ini.
Mamundo man na pigheras kan opisyal na an nasa 80 hectares na omahan sa parte kan Masbate an nasa damage level na, boot sanang sabihon alang na soboot an daga asin mayo na nin bastanteng mapagkukuanan nin tubig.
Mientrastanto sa parte man kan Camarines Norte asin Sorsogon mayo pa nin nairehistrong danyos an El Nino asin mayo pa nin naapektarang mga paraoma.
Pigsierto man ni Baraero na padagos dagos an pagpapaabot nin tabang kan NIA-Bicol sa mga apektadong areas siring na sana kan pagpapasubli nin apat na augmentation water pumps sa mga ini na makakatabang sa pagkakaigwa nin bastanteng supply kan tubig sa mga omahan.
Sa ngunyan, piglalaoman man kan National Irrigation Administration -Bicol na madudugangan pa an numero kan mga ektarya kan omahan an maaapektaran kan labing ini sa mga masunod na bulan.
