NAGA CITY- Pigsaysay kan Department of Environment and Natural Resources na poco mas o menos 85 percent kan semilya nin kahoy na pigtanom sa Rehiyong Bikol an nakasalbar asin nagtalubo.
Sigun ki DENR-5 Assistant Director for Management Services Ronnel Astor, importante soboot na masierto an halangkaw na survival rate kan semilya antes na itao sa mga organisasyon o non-governmental organizations.
Huli kaini, nagkukundusir soboot sinda nin inspections antes an final na turnover tanganing maasegurar na maabot an 85 percent na survival kaini.
Parte an programa na ini kan Enhanced National Greening Program (NGP), tolong taon na reforestation initiative an obheto na maproteheran asin mapreserba an kapalibutan.
Kan taong 2024, an DENR nakapagtanom nin 1,125,830 semilya sa mga regular areas asin 287,500 sa protected areas kun saen an kabilugan na numero kaini an nagpapakol sa 1,413,330 semilya sa haros 2,112 hectares sa Rehiyon sa anom na probinsiya kan Bicol.
Mientrastanto, an Comprehensive site development, na kinababalihan kan seedling production asin plantation establishment an naka-focus sa enot na taon na kan NGP.
An panduwa asin pantolong taon an pigtagama para sa protection asin maintenance kan planted areas.
An espasyo man para sa mga semilya an depende sa klase kan kahoy na pigtanom.
Para sa mga nagbubunga na kahoy an espasyo an mas mahewas mantang para sa indigenous trees an espasyo an magkahararani.
