Nagtitinir sa P6.793 trillion an 2026 national budget na pig-endorso kan Senate Committee on Finance sa plenaryo kan Senado.
Pig-isponsoran na ni Finance Committee Chairman Sherwin Gatchalian an 2026 General Appropriations Bill (GAB) asin digde pigbida kan senador an mga lakdang tanganing gibuhon mas transparent an budget process makalihis na magin isyu an budget insertions sa mga kwestyunableng flood control projects.
Sa pig-endorsong budget version kan komite pigbawasan nin P68 billion an unprogrammed appropriations kun saen marurumduman na digde kaidto kinua an P25 billion na pondo para sa flood control projects.
Sa bersyon kan Kamara para sa 2026, P243 billion an unprogrammed funds alagad sa Senado pigbaba ini sa P174 billion.
Nagbaba man nin lampas P55 billion an 2026 budget kan DPWH o nasa P568 billion na sana.
Kun igwang binawasan, dinugangan man an pondo kan Department of Education (DepEd) gikan sa P914 billion na bersyon kan Kamara sa P992 billion sa bersyon kan Senado.
Pig-apod man ni Gatchalian na “education budget” an 2026 national budget na masimbag sa kakulangan nin mga classrooms.
Pira pa sa nadugangan nin pondo an PhilHealth na may P376 billion para sa pagpapautob kan Universal Health Care Act aain zero balance billing program, siring man piglangkawan man an pondo sa social pension kan mga indigent senior citizens.
