NAGA CITY- Pigtawan duon kan pamayuhan kan Naga City Police Office na dae mapabaya an saindang lado sa piglalaoman na pagdagsa kan mga tawo sa siyudad nin Ngaa katakod kan Christmas celebration.
Sa nagin paghampang sa mga kagawad kan media ni PCOL. Erwin Rebellon, City Director kan NCPO, sinaysay kaini na pigpaplanuhan kan saindang hepatura an pagdugang nin mga personahe na mabantay sa boarder control kan siyudad o sa mga pigkokonsederar na mga entry asin exit points tanganing malikayan na mabiktima nin mga kawatan an publiko.
Sigun pa sa opisyal, papahigoton man an police visibility asin police presence ara-aldaw komo lakdang sa pagpapahigot pa kan seguridad sa bilog an Naga City.
Paliwang ni Rebellon, tuyong holiday season, bako sanang mga turista, residentes kan siyudad an mga nagdadagsa sa lugar kundi magin an mga kawatan na pigsasamantala an christmas rush asin busy an mga tawo sa pagpreparar katakod kan selebrasyon.
Huli kaini, pigsaysay kan opisyal na ipapautob kan saindang lado an heightened alert status komo dugang na security sa panahon kan kasiributan.
Sa ngunyan, hagad na sana kaini an kooperasyon kan publiko tanganing magin matuninong sana an pagselebrar kan kapaskuhan.
