Padagos an ginigibong imbestigasyon kan Naga City Police Office (NCPO) manungod sa naglalakop na impormasyon tungkol sa suboot huma sa nagkapirang mga eskwelahan sa syudad.
Komo paglikay na mayong mangyaring anuman na insidente, nagdeploy nin mga pulis sa mga eskwelahan tanganing masiguro an seguridad kan mga estudyante asin mga empleyado.
Segun ki Police Lieutenant Colonel Elmer Azurez Jr., Public Information Officer (PIO) kan NCPO, an pinakaenot na lakdang kan kapulisan iyo an pagberipikar kan naresiber na impormasyon tanganing matukoy kun ini tunay asin igwa nin sapat na basehan.
Katuwang kan NCPO an Cybercrime Group tanganing aramon kun sain gikan an impormasyon asin masuri an tunay na situwasyon manungod sa sinasabing banta.
Ipinaliwanag ni Azurez na bako sanang sarong eskwelahan an binabantayan kan pulisya huli ta nagdeploy nin mga pulis sa haros gabos na eskwelahan sa syudad bilang preventive measure laban sa ano man na posibleng insidente.
Mientrastanto, piglinaw kan opisyal na mayo pa nin partikular na eskwelahan na puedeng pangaranan mantang nagpapadagos an beripikasyon asin imbestigasyon.
Segun pa ki Azurez, matao sana an NCPO nin dugang na impormasyon kun natapos na an beripikasyon asin may resulta na hali sa Cybercrime Group.
Nangangapodan an kapulisan sa publiko na magtiner na kalmado asin likayan an pagpapalakop nin mga impormasyon na dai pa beripikado mantang nagpapadagos an imbestigasyon.
