NAGA CITY – Pinagpeprepararan na kan pamayuhan kan Naga City Police Office an posibleng liwat na paglaog kan mga kawatan sa syudad nin Naga sa kasagsagan kan selebrasyon kan Peñafrancia Festival.
Sa nagin paghampang sa mga kagawad kan media ni PLt.Col. Dario Sola, Deputy City Director for Administration kan NCPO, sinaysay kaini na pig-aandaman na ninda an liwat na paglaog kan mga import na mga kawatan sa syudad orog na kun an pagbabasehan an mga pangyayari kan mga nakalihis na taon.
Katakod kaini, mas orog na pinahigot kan mga kapulisan an saindang pagbabantay tanganing malikayan an pagkuriyat kan mga ini sa syudad orog na sa kasagsagan kan mga kasiributan.
Liwat man na nagpagirumdom an opisyal magin malikay asin dae paghayaan an mga sadiri na mabiktima kan masasamang loob. Pagirumdom man kan opisyal na likayan man na mag park kan mga behikulo sa mga madiriklom na lugar tanganing malikayan na makalwagan an mga ini.
Alagad, tinawan duon man kan opisyal na igwa man sinda nin mga personahes na yaon sa mga tinampo na nagbabantay na pupwedeng mahagadan nin tabang sa oras kan emerhensya.
Sa ngunyan, nagpapadagos pa an mga preparasyon na pigkokondusir kan PNP para sa nasambitan ng dakulang aktibidad sa syudad nin Naga.
