NAGA CITY- Pigheras kan Naga City Police Office an saindang mga nagin accomplishment kan nakalihis na semana.
Sa nagin paghampang sa mga kagawad kan media ni PLtCol. Chester Pomar, tagapagtaram kan Naga City Police Office,sinaysay kaini na para soboot sa peryodo puon ika-2 nin Disyembre hasta ika-8 kan presenteng taon, igwa nin naarestrar na mga indibidwal na imbwelto sa illegal drugs kun saen nakumpiskar pa an pinagtutubudang shabu.
Apwera digde, igwa man naarestrar pa na tolo katawo huli sa kasong Homicide asin Death mantang apat man na indibidwal an arestado para sa illegal gambling.
Sigun pa sa opisyal, igwang naarestrar na saro pang indibidwal para man sa kasong physical injury asin direct assualt.
Sa ibong na lado, padagos man an pigkukundusir na orientation asin seminar kan mga personahe kan NCPO tanganing makaheras nin impormasyon sa publiko dapit sa mga programa kan saindang hepatura para sa publiko.
Piglinaw man kan opisyal, na an saindang mga nakumpiskar na droga an tolos na pigtatao sa crime lab nin huli ta mandato sa saindang lado na dae mag-stock nin mga ebidensiya sa kada Police Station sa bilog man na siyudad.
Sa ngunyan, padagos an pangapudan ni Pomar sa publiko na makisumaro sa saindang mga programa tanganing mamantinir an paz y orden sa bilog na Naga City.
