NAGA CITY – Tinawan duon pamayuhan kan Naga City Police Office na baku sanang motorsiklo an saindang pigsisitar sa checkpoint kundi an gabos na klase kan behikulo.
Sa nagin paghampang sa mga kagawad kan media ni PCol. Erwin Rebellon, NCPO Director, sinaysay kaini na puon kan ini an magtukaw komo City Director tinawan duon na kaini na baku sana an mga motorsiklo an behikulo sa tinampo kun kaya dapat gabos na nagdadalagan digdi an dapat na i-check sa mga checkpoints.
Dugang pa kan opisyal na magin an mga 4 wheels an pighihiling ninda huli ta kadalasan an mga ini an piggagamit sa pagtatransport nin darakulang kantidad kan droga na dae na kayang ilunad sa motor huli ta harayo an pagdadarahan kan mga ini.
An mga siring na darakula nang kantidad kan droga an karaniwang pigkakarga sa mga delivery car, bus, asin private cars, kun kaya kaipuhan man na reparohon asin i-check an mga laog asin lunad kan mga ini.
Sigun pa ki Rebellon, mas kadakol soboot sindang pigpapara na mga four wheels kesa mga 2 wheels na behikulo sa saindang mga check point.
