NAGA CITY- Padagos an pagpapatanid kan Naga City Police Office sa publiko na maglikay sa manlaen-laen na klase kan scam orog na ngunyan na papaabuton an Holiday season.
Sa entrevista kan Bombo Radyo Naga ki PCPT. Daisy Angeles, Public Information Officer kan Naga City Police Office, sinaysay kaini na nagkukuriyat ngunyan an mga scammers kaya kaipuhan na pirmeng pasiguro an publiko orog na sa pag-send nin mga kwarta.
Kaipuhan na nag-agi ini sa pag-verify tanganing malikayan na mabiktima.
Dugang pa ni Angeles, dae soboot magbukas or mag click nin mga links huli ta sa paagi kaini nakukua an mga impormasyon kan sarong indibidwal.
Pigtawan duon pa kan opisyal na kadaklan sa saindang mga kaso na nairerehistro tuyong pasko an mga siring kaini na kun saen kadaklan sa mga nagrereklamo nawawaran nin mga kwarta sa saindang e-wallet asin mga bangko.
Sa ngunyan, pigsierto na sana kan opisyal na padagos an saindang ginigibong mga lakdang tanganing masierto an kasalbaduhan kan publiko ngunyan na kapaskuhan asin bagong taon.
