NAGA CITY- Pinagirumduman kan Naga City Police Office an publiko na nag-iiral pa man giraray hasta ngunyan an Comelec Gun ban.
Sa entrevista kan Bombo Radyo Naga ki PSSG. Roberto Aguillon, Assistant Public Information Officer kan NCPO, sinaysay kaini na makalihis an eleksyon nagpapadagos pa man giraray an saindang pagkundisir nin mga checkpoint sa siyudad nin Naga huli ta nagpapadagos pa man giraray an Comelec Gun ban.
Sigun ki Aguillon madurar ini hasta sa June 11 kan prenteng taon.
Boot sabihon an mga dae otorisado na magbitbit kan saindang badil apwera sa mga law enforcement officer asin mga pigtawan nin special permit kan Comelec an dae pwedeng magdara nin badil sa luwas kan saindang mga kaharongan.
Alagad enkaso man ma-lift na an Comelec Gun ban nagtitinir na an mga dae otorisado o mayong mga permit an saindang badil makakasuhan enkaso nagbalgar sa pigpapautob na ley.
Huli kaini, padagos na pig-enkaminar ni Aguillon an publiko na padagos na magsunod sa nag-iiral na panundunan tanganing dae mabugtak sa alanganin na sitwasyon.
Sa ngunyan, pigsierto man kan opisyal na dagos-dagos an saindang mahigot na pagbabantay sa bilog na siyudad nin Naga tanganing mamantinir an paz y orden kan lugar.
