Pigbandera kan National Disaster Risk Reduction and Management Council (NDRRMC) sa red alert status an saindang Operations Center asin pig-activate na an mga response cluster tanganing italaga an mga lead agency na mamanehar sa response operations.
Sa pahayag, pigbuyagyag kan ahensya na alas-12 nin udto kan Oktubre 10, pig-activate an response clusters komo simbag sa mga makukusog na linog sa Manay, Davao Oriental.
An NDRRMC pinangengenutan kan Office of Civil Defense (OCD). Sa irarom kan red alert status, pigsugo an OCD na magmanehar sa logistics asin early recovery, mantang an Department of Social Welfare and Development (DSWD) responsable sa pagmamanehar kan mga pagkakan asin non-food items, camp coordination and management, asin proteksyon kan mga internally displaced persons (IDPs).
Sigun sa OCD, an paglangkaw kan alerto sa pinakahalangkaw na antas nagsusugo sa mga representante gikan sa Armed Forces of the Philippines (AFP), Philippine National Police (PNP), Bureau of Fire Protection (BFP), asin Philippine Coast Guard (PCG), siring man sa mga technical personnel gikan sa Department of the Interior and Local Government (DILG), DSWD, Department of Public Works and Highways (DPWH), asin Department of Health (DOH) na mag-duty sa physical operations center sa Camp Aguinaldo.
Mientrastanto, an iba pang mga ahensya nagpartisipar man sa emergency operations sa paagi kan virtual platform.
