Negosyante, gadan makalihis pagbabadilun kan armadong suspek sa CamSur

Gadan an sarong negosyante makalihis pagbabadilun kan mga armadong suspek sa Barangay Lanipga Cawayan, Ragay, Camarine Sur kasudmang hapon.

Binisto an biktima na si Raymond Eglip, 27-anyos.

Sa nagunong impormasyon kan Bombo Radyo Naga, napag-araman na bigla na sanang pinagbabadil kan mga dae pa nabibistong suspek an biktima pasado alas-2:30 nin pagkahapon, mantang yaon sa Barangay Lanipga Cawayan.

Nagsapo nin tama kan bala sa saiyang payo asin lawas an biktima na nagresulta sa saiyang tulos na kagadanan.

Blangko pa ngunyan an PNP Ragay sa kun ano an posibleng rason kan pambabadil.

Sa ngunyan, padagos pa an imbestigasyon kan mga otoridad para sa marikas na pagkakabistuhan asin pagkakaarestar sa mga kagibo kan naunambitan na krimen.