NAGA CITY – Nagdestrebwer nin relief operation an sarong negosyante sa mga naapektaran kan kalamidad asin man 10 barangay sa siyudad nin Naga.
Sa entrevista kan Bombo Radyo Naga ki Robert Obieda, Negosyante, pigsaysay kaini na igwa ining mga personahe na naglibot asin naghiling kan most hard hit kan nakalihis na bagyong Kristine asin an napili iyo an 10 barangay.
Katakod digde, nagkundusir nin house to house an grupo tanganing magtao nin relief sa mga poorest of the poor. Huli ta limitado sana man an nasambitan ng relief asin 3000 packs sana ini, an 10 barangay tigtorolong gatos sana.
An nasambitan ng relief packs igwang laog na bagas, kape, bihon, mga delata asin noodles, ini man an mga basic needs kan sarong pamilya.
Sigun pa ki Obieda na an katabang kaini sa pagheras nin tabang iyo man an saiyang mga personahe sa villa caceres hotel, mga pribadong indibidwal asin mga volunteers siring man an KBP.
Mientrastanto, kakaulayon man kaini an saiyang organisasyon sa Manila na kun pwede mag-sponsor nin medical mission makalihis an saiyang proyekto digde.
Pangapudan man kaini sa mga kahimanwa na nakakaluwag-luwag na magtabang sa mga kapos-palad na naapektaran kan kalamidad.
Naghagad man nin pasensiya si Obieda sa mga dae naabot kan relief huli ta dae soboot kaini kaya na maabotan gabos nin tabang an bilog na populasyon kan siyudad nin Naga.
