NAGA CITY – Ipinagmalaki ni Senator Migz Zubiri na ma-generate nin kita para sa Senado an ipapatindog na New Senate Building (NSB) sa Taguig City.
Sigun ki Zubiri, madara nin dugang na kita para sa Senado an New Senate Building nin huli ta an pirang parte kan edificio digdi an pupwedeng iparenta sa ibang opisina kan gobyerno.
Pighalimbawa kan senador an Commission on Appointments na direkta nang mabayad nin renta sa Senado enkaso nakalipat na sa bagong edificio asin dae na mapapasiring sa Philippine National Bank an ibinabayad na upa siring ngunyan.
Apwera digdi, bilyon-bilyong piso an matitipid kan Halangkaw na Kapulungan nin huli ta dae na mabayad nin renta sa GSIS. Soboot, an kada taon na upa sa GSIS sa edifico na pigrerentahan kan Senado an mapakol sa P500 million asin kun maabot nin limang taon nasa P5 billion an tulos na matitipid kan Halangkaw na Kapulungan asin P10 billion man kun abuton nin 10 taon.
Dugang pa ni Zubiri, an haros P9 billion na pigsasabo an phase 1 pa sana kan New Senate Building kun saen structural o an shell na pinakaluwas kan building pa sana ini. Sa phase 2 soboot an pagkumpleto kan gabos nin mga structural works hasta sa laog mantang an phase 3 an nagsasabi man sa paglalaog nin mga kagamitan siring kan aircons, ilaw, asin iba pang mga gamit na kaipohan.
