NAGA CITY- Nagpakol sa kabilugang 824,111 bags kan paroy an nakaimbak ngunyan sa manlaen-laen na bodega kan National Food Authority Bicol.
Sigun ki Julie Llenaresas, Assistant Regional Manager kan NFA-Bicol, an nasambitan ng numero kan nakatago na paroy an binakal sa mga lokal na paraoma gikan sa manlaen-laen na probinsiya sa Rehiyong Bicol.
Paliwanag ka opisyal, trabaho ninda an magbakal nin mga paroy na gikan sa mga paraoma tanganing gibuhon man na buffer stock na gagamiton sa panahon kan kalamidad asin sa iba pang programa kan gobierno.
Kasabay kaini, maogma man na pigheras ni Llenaresas na halangkaw an imbentaryo kan gobierno sa bagas sa presente kun kaya piglalaoman na bastante ini sa pangangaipuhan kan mga tawo.
An kagayunan pa kan programa, natatabangan pa an mga paraoma na maiangat an saindang pagbuhay asin nabawasan an pig-aangkat na bagas gikan sa ibang nasyon.
Huli digde, padagos an pag-enkaminar kan opisyal sa mga paraoma na deriktang ipabakal an saindang mga aning paroy sa NFA tanganing maasegurar na dae nadadaya sa presyuhan kaini sa ngunyan.
Padagos soboot kaya an mandato kan Presidente na siertuhon an marhay na barakalan kan paroy para sa mas halangkaw na suplay kan bagas.
Sa ngunyan, pigsierto na sana ni Llenaresas na padagos an saindang mga programa sa pagtabang sa mga paraoma susog naman sa kasuguan ni Presidente Marcos Jr.
