NAGA CITY- Pigsaysay kan NFA-Camarines Sur na strikto nindang pigpapautob an mga panundunan sa pagbakal nin paroy gikan sa mga paraoma.
Sa entrevista kan Bombo Radyo Naga ki Marbin Malabanan, Officer-In-Charge, Branch Manager kan NFA-Camarines Sur, sinaysay kaini na kinakaipuhan na igwang darang certification gikan sa Municipal Agriculture Office an siisay man na paraoma na mapabakal kan saindang paroy sa NFA.
An nasambitan kaya na certification an nagpapatotoo na sinda an miyembro kan Registry System for Basic Sectors in Agriculture. Apwera digde, igwa man nin form na kaipuhan fill upan an mga paraoma na mandatoryo sa saindang lado.
Alagad enkaso enot na pagkakataon na magdara nin paroy sa NFA o an pig-aapod na walk in farmers pig-aako man ini kaipuhan sana na siertong marhay an kalidad kan paroy asin laog sa parameters kan saindang opisina.
Dugang pa kan opisyal, igwa sindang mga personahe na nagsusukol sa moisture content kan paroy kaipuhan soboot na dae ini basa asin bakong itom.
Importante soboot na magsairarom sa mahigot na pag-inspeksyon an mga pigbakal na paroy nin huli ta para ini sa buffer stocking kan nasyon na gagamiton man tuyong igwang emerhensiya.
Sa ngunyan, pigsierto kan opisyal na dagos-dagos an saindang pag-akomodar sa mga paraoma tanganing mas makatabang pa sa mga ini.
