NAGA CITY- Pig-ekaminar kan National Food Authority an mga lokal na gobierno sa Bicol Region na tawan asistensiya an mga paraoma sa paagi kan pagsuporta sa presyuhan kan paroy na pigtatangro kan saindang ahensiya.
Sigun ki Julie Llenaresas, NFA assistant director kan Bicol, saindang pigsusuhestyon sa mga gobernador asin alkalde na ikonsederar na gamiton an parte kan saindang Financial Assistance to Local Governments (FALGU) tanganing mapalangkaw an pagbakal nin paroy kan NFA.
An Financial Assistance to Local Governments an sarong pambansang inisyatibo asin igwang obheto na magtaong asistensiya sa mga local governments sa pag-implementar kan manlaen-laen na developmental projects, kabali na igwang kinaaraman sa agrikultura.
Susog sa kalkulasyon, kan mga eksperto sa industriya, an P5 na langkaw sa presyuhan kan paroy an pwedeng magresulta sa dugang na income na mapakol sa P20,000 kada paraoma, basado naman sa presenteng pambansang average na ani na 4 tons kada hektarya.
An inisyatiba an posibleng mas makatabang sa pagtalubo sa kita kan mga lokal na paraoma na nasasakitan sa hababang presyuhan kan paroy orog na ngunyan na presenteng harvest season.
Mientrastanto, an pagbaba man sa presyo kan imported na bagas an rason kun tano habong bakalon kan mga lokal na traders an lokal man na paroy na mas halangkaw sa P17 kada kilo.
