Mapuon na sa masunod na semana an pagheras kan National Food Authority (NFA) na mga bagas sa Kadiwa store asin mga piling merkado.
Sigun ki NFA Adminstrator Larry Lacson, na tanganing magkaigwa nin espasyo an mga bodega kan NFA huli sa nararani na an panahon kan anihan, saindang babawasan an mga laog kan mga ini.
Nagkapira sa mga bodega na saindang babawasan iyo an sa Ilocos Region, Cagayan Valley, Central Luzon, Western Visayas asin SOCCKSARGEN.
Sa irarom kaya kan food security emergency pwede nindang iluwas an nasambitan ng mga bagas basado na man sa kasuguan gikan sa Department of Agriculture.
Dugang pa kaini na an mga lumang stock na bagas an maipapabakal ninda nin P29 kada kilo na ini esklusibong ibebenta sa senior citizen, persons with disabilities, solo parents asin magin an mga benepesaryo kan Pantawid Pamilyang Pilipino Program (4Ps).
