NAGA CITY- Pigmarhay kan NIA-Bicol na magkundusir nin Irrigators Association Day komo pagpapasalamat sa paglalapigot kan gabos na mga Irrigators Association asin farmers sa bilog na Bicol Region na pakusugon an sektor kan agrikultura asin pagkakan sa Rehiyon.
Sa nagin paghampang sa mga kagawad kan media ni Ma. Cleofe Baraero, Spokesperson kan NIA-Bicol, sinaysay kaini na an nasambitan ng lakdang an importante tanganing mamatean man kan mga nasambitan ng sektor an saindang importansiya sa komunidad orog na an pagsabuhay kan mga programa kan NIA na nakabase sa kasuguan kan gobierno nasyunal.
Sigun pa ki Baraero, tatawan nin rekognasyon kan saindang lado an mga paraoma na igwang pinakamagayon na display nin gulay, most compliant irrigators association, igwang pinakadakol na ani sa contract farming na saro sa mga programa na pigbilog kan ahensiya, Irrigation Management Offices na marhay an performance siringman an duwang IMO na Sorsogon asin Camsur na pioneer kan Farming Support Services na yaon sa Bicol.
Apwera digde, igwa man pakawat sa mga farmers asin an pagtatao nin parangal sa National Government Agencies na nakatabang kan NIA tanganing mairani an saindang mga programa sa publiko.
Sa ngunyan, pigsierto na sana kan opisyal na mapadagos an magagayon na programa kan saindang ahensiya na makakatabang sa mga paraoma asin mga Irrigators Association.
