NAGA CITY- Pigklaro ngonyan kan National Police Commission (NAPOLCOM) na solamenteng sa PNP Entrance Examination sana epektibo an ‘no height requirement policy’.
Ini katakod kan nagluwas na mga bareta na posible na suboot makalaog sa pambansang kapulisan an mga indibidwal na dae mapasar sa standard height kan PNP na 5’2 sa babae asin 5’4 sa lalaki.
Sa entrevista kan Bombo Radyo Naga ki Napolcom Bicol Assistant Regional Director Atty. Edman Pares, pigklaro kaini na solamenteng sa PNP entrance examination sana naghahaloy an height requirement para matawan nin pantay na oportunidad na magkaigwa nin eligibility hale sa saindang opisina an gabos na mawot na maging sarong pulis.
Magiging epektibo suboot an nasambitang polisiya sa ikokondusir na entrance exam sa maabot na Abril 22, 2018.
Tinawan doon ni Pares na kinakaipuhan munang maamyendaran an ley na nagtatalaan kan height requirement antes na matugutan na makalaog komo sarong pulis an sarong indibidwal na dae mapasar digdi.
Mientrastanto, sigon ki Pares, nagtatao nin waiver sa height requirement an NAPOLCOM sa mga indibidwal na mawot na makalaog sa PNP urog na kun igwa nin mga special skills an mga ini arog kan pagiging matibay sa martial arts, sharpshooter asin iba pang mga skills na related sa pagtatrabaho komo sarong pulis.
