NAGA CITY– Ikokondusir ngonyan na aldaw an sarong noise barrage asin rally kan sarong unibersidad sa ciudad nin Naga komo pagpapahiling kan mahigot na pagkontra sa pigtutulod na death penalty bill na naipasar na sa House of Representatives suodma.
Sa nakuang impormasyon kan Bombo Radyo Naga, napag-araman na ikokondusir atyan na alas-11:30 hasta alas-12 nin udto an noise barrage sa Ateneo de Naga University (ADNU).
Iniengkaminar an mga mapartisipar sa aktibidad na magsulot nin kolor itom na bado komo pagpapahiling kan mahigot na pagkontra sa pag-aprubar kan nasambitang propwestong ley sa kongreso.
Mayo man suboot mangyayaring kanselasyon nin klase an nasambitang unibersidad alagad iniengkaminar an mga estudyante asin paratukdo na magpartisipar sa aktibidad.
Apwera sa ADNU, mapartisipar man sa noise barrage an mga estudyante hale sa University de Santa Isabel (USI) asin Naga Parochial School (NPS).
Mientrastanto, sinaysay man ni Vince Casilihan, tagapagtaram kan Bayan Bicol, nagluluwas na sarong pang-ho-hostage an nangyaring pagkakapasar kan death penalty suodma.
Pighumaan suboot kan House Leadership an mga kongresista na hahaleon sa saindang mga posisyon sa kongreso enkaso dae magpabor sa death penalty.
Naglalaom man si Casilihan na dae tutugutan kan Senado na pormal na maipasar komo sarong ley an pigtutulod na death penalty bill.
