NAGA CITY- Nagsumiter na nin ‘not guilty’ plea an dating municipal councilor sa Camarines Sur asin an saiyang esposa sa regional trial court (RTC) katakod kan kinakahampang nindang suruon-suon na kasong syndicated estafa asin pagbalgar sa batas pambansa 22 o an Bouncing Check law.
Sa nagunong impormasyon kan Bombo Radyo Naga, napag-araman na nagsumiter nin ‘not guilty’ plea si dating Magarao municipal councilor Nestor Avenido asin an saiyang esposa na si Maria Joy Avenido katakod kan saindang kaso.
Napag-araman na nagkaigwa na nin arraignment para sa mga kaso na bibistahan sa sala ni Judge Erwin Virgilio Ferrer kan RTC Branch 33, sa Pili, Camarines Sur.
Apwera sa kaso na dadangugon sa RTC Branch 33, igwa pang ibang mga kasong kinakahampang an mag-agom na Avenido sa tolo pang mga korte sa probinsya.
Mayong nirerekomendar na pyansa an nasambitang kaso kan mag-agom na suspetsado.
Enot pa kaini, nagpasiring na an mag-agom na Avenido sa sala ni Judge Ferrer para sa pagbasa nin sakdal alagad dae ini nadagos huli sa kawaran nin abogado kan duwang mga akusado.
Marurumduman na nadakop an mag-agom na Avenido kan Abril sa Sto. Tomas, Batangas.
Igwang naiserbeng labi sa 60 mga warrant of arrest laban sa duwang mga suspetsado asin sinasabing nag-abot sa P200 milyon an nalalay kan mga ining kantidad nin kwarta.
Sa ngonyan, nagtitinir na an mag-agom na Avenido sa Tinangis Penal Farm, sa banwaan nin Pili, Camarines Sur.
