NAGA CITY- Sinakyada kan pigtutubudang mga miyembro kan rebeldeng New People’s Army (NPA) an sarong construction site asin niraot pa an nagkapirang mga construction equipments sa Lagonoy, Camarines Sur.
Sa entrevista kan Bombo Radyo Naga ki PO3 Vicente Imperial, hale sa PNP Lagonoy, sinaysay kaini na nagpasiring suboot sa harong ni kapitan Antonio San Luis kan barangay Pinamihagan an poko mas umenos 15 mga pigtutubudang miyembro kan rebeldeng NPA.
Kinua kan mga suspek an manlaen laeng mga gamit asin an pitong mga security guard uniform kan mga biktima na sinda Lorenzo Maraggay, 52-anyos asin Noel Solano, 45-anyos na mga security guards kan Isaac Construction.
Binitbit pa kan mga rebelde si kapitan San Luis sa pwerang parte kan lugar na tulos man na pinalibre makalihis an pirang oras.
Apwera sa mga gamit na nilalay kan mga rebelde, niraot man suboot kan mga ini an nagkapirang mga construction equipments na pagsasadiri kan nasambitang kompanya asin sinaysay na kinakaipuhan na iuntok na an pinapatrabahong tinampo sa lugar.
Sa ngonyan, nakikipagtabangan na an PNP sa linyada kan Philippine Army tanganing maberipikar kun totoong miyembro kan makawalang grupo an nagpasiring sa nasambitang lugar.
