Kinumpirmar kan local authorities sa Nepal kan nakalihis na Biyernes, Setyembre 12 na nagsunad na sa 51 an numero kan mga binawian nin buhay sa madahas na protesta sa nasambitan ng nasyon.
Kaibahan sa mga nagadan an 21 protesters kan nakalihis na Lunes sa kasagsagan kan crackdown kan kapulisan sa mga pigsasagibong demonstrasyon kontra sa pagbabawal kan gobyerno sa social media, korapsiyon asin maluyang pamamamayo.
Sa kampo kan kapulisan, kinumpirmar ni Police spokesman Binod Ghimire na tolong pulis an binawian nin buhay.
Kaibahan man sa mga nagadan an nagkapirang mga preso sa kasagsagan o pagkatapos nindang makatakas gikan sa pakikipaglaban sa Nepali security forces.
Nagkapirang pugante man an nagporbar na magtakas pasiring sa India alagad nadakop kan mga Indian forces na nasa border.
Igwa man soboot 13,500 na preso an nakatakas gikan sa mga kulungan sa bilog na Nepal mantang nangyayari an kariribokan kun saen nagkapira sa mga ini an nadakop na mantang igwang 12,533 pang nagtitinir na at large.
Sigun man sa Army kan Nepal, narekober ninda an 100 badil na hinabon sa kasagsagan kan kadahasan kun saen naaktuhan an mga protester na winasiwas an automatic rifles.
Sa ngunyan, nagpapadagos an pag-urulay sa pag-ultanan kan Presidente, mga representantes kan protesters, asin importanteng personalidad na pwedeng mamayo sa sarong interim administration mantang nagpautob man an Nepali Army kan curfew asin nakadeploy sa mga tinampo.
