Nagpakol na sa dae mababa sa 20 katao an gadan asin labi sa 170 an irido makalihis magbagsak an sarong fighter jet kan Bangladesh Air Force sa sarong eskwelahan sa Dhaka.
Marurumdumang an insidente an nangyari sa Milestone School and College, sarong pribadong eskwelahan.
Kadaklan sa mga biktima iyo an mga aking estudyante na kakauli pa sana gikan sa klase kan magbagsak an Chinese-made F-7 BJI jet.
Sigun sa militar, an piloto na si Flight Lieutenant Towkir Islam an nasa sarong training mission kan naka-eksperyensya nin mekanikal na aberya.
Napagaraman man na ini an saiyang primerong solo flight, sigun sa saiyang tiyuhon.
Pinorbaran pa soboot kan piloto na irayo an eroplano sa mataong lugar alagad nagbagsak pa man ini sa establisyemento kan eskwelahan.
Mientrastanto sa mga nalugadan, nagpaaraman man na nasa edad walo hasta 14 anyos, susog sa ospital kun saen sinda dinara.
Pito sa mga bangkay an dae pa man nabibisto. Kadakol na mga kaparientes an nag dagsa sa ospital, mantang an mga volunteer man an nagsagibo nin blood donation drive.
Nagdeklarar na nin national mourning an gobyerno ngunyan na aldaw nin martes.
Nagpahayag man nin pakikidumamay si Indian Prime Minister Narendra Modi, asin sinabing preparadong magtaong tabang an India.
An insidente an pigkokonsiderar na pinakamalalang aviation disaster sa Bangladesh magpuon pa kan nakalihis na taong 1984, kun saen 49 an gadan sa sarong commercial flight crash.
