Nagpakol na sa 60 an natukoy kan Armed Forces of the Philippines na 60 non-existent o mga “ghost” flood control projects.
Ini an parte kan pagtabang kan Sandatahan sa Department of Public Works and Highways (DPWH) na pangenot na nagsasagibo nin inspection asin verification sa mga nasambitan ng proyekto, basado sa available public records.
Sigun ki AFP Chief of Staff Romeo Brawner Jr., natawan sinda nin actual coordinates kun saen dapat pigtugdok an mga flood control project, asin an mga ini an tinunton kan mga suldados.
Hasta sa 60 soboot an natukoy kan team kan mga suldados komo non-existent o mayong naipatayo. An mga ini an igwa man na available public records siring kan ondo, pangaran kan contractor, asin an pagkukuanan nin pondo.
Nagpapakol na sa 8,000 flood control project an nasuri kan AFP.
Sigun ki Gen. Brawner, posibleng malangkaw pa an numero kan mga ini huli ta nagpapadagos man an paglilibot asin inspection sa manlaen-laeng lokasyon.
Sa kabilogan, natawan an AFP nin hasta sa 16,000 project tangani surion. Nilinaw man kan heneral na an papel kan AFP an limitado sana sa pagtukoy kun igwang naitugdok na proyekto sa sarong lugar, sa tabang kan nakuang coordinates.
Sigun ki Gen. Brawner, mayong technical expertise an military units tangani surion an construction quality o tukuyon an compliance kan mga ini sa mga nakapalaog na specifications.
Dugang pa kan heneral, gabos kan mga report dapit sa flood control project an naipapasakamot sa DPWH. Bahala na soboot an ahensiya na magpadara nin mga engineer kaini tangani magsagibo nin validation sa report kan nasambitan ng hukbo
