NAGA CITY-Nagsakat an numero kan mga parasisirang Pilipino sa Scarborough Shoal sa ibong pa man kan pagpapautob kan China kan polisiya kaining pag-arestar asin pagkulong sa mga dayuhang malaog sa pig-aangkin kaining kadagatan nin hasta 60 aldaw na mayong paglilitis.
Sigun ki Philippine Coast Guard(PCG) spokesperson for the West Philippine Sea Commmodore Jay Tarriela, puon kan manotaran kan mga parasisirang Pilipino an presensya kan 2 pig-deploy na barko kan PCG na BRP Sindangan asin BRP Malapascua kan Hunyo 14 tangani na magpatrolya sa lugar, nagdakul pa an numero kan mga Filipino fishing boats sa lugar.
Basado pa sa ahensya, gikan sa na-obserbaran nin 3 filipino fishing boats kan hunyo 15, nagsakat ini sa 7 asin nasa 10 na man sa presente.
Sigun man sa grupo nin mga parasisira na Tropical Fish Gatherer Association sa Masinloc Zambales, may pirang parasisira na an naglilikay na maglawod sa pirang lugar sa West Philippine Sea partikularmente na sa Scarborough Shoal huli sa takot sa huma kan China.
Nag-apelar an mga ini sa gobyerno na magtao nin seguridad sa mga parasisirang Pilipino na mawot magbalik nin magsira sa Shoal asin pigtawan duon kan mga ini na habo nindang maagaw kan China an nasambitang maritime feature kan satuyang nasyon.
Mientrastanto pigsierto man ni Commodore Tarriela na committed an PCG sa paggampan kan responsibilidad kaini sa nasyon tangani na masierto an kasalbaduhan kan mga parasisirang Pilipino sa West Philippine Sea.
