Pig-anunsyar kan Bureau of Corrections (BuCor) an pagpapalaya kan 1,000 na mga Persons Deprived of Liberty (PDLs) puon kan nakalihis na Nobyembre hasta kaining bulan kan Disyembre.
Sa tala kan komisyon, 625 an nakatapos kan saindang pinahababang sentensiya, 134 digde an na-acquit, 38 man an nasa probation, mantang 190 an nakaresebir kan parole, 11 man an pinalaya sa paagi kan habeas corpus, asin an saro an itinao an mosyon para sa pagpapalaya kaini.
Kadaklan sa mga pinalaya kan BuCor an gikan sa manlaen-laen na pasilidad pangkulungan, kaibahan na an New Bilibid Prison, Correctional Institution for Women, asin iba pang mga Prison and Penal Farm kan nasyon.
Puon kan manungkulan si Justice Secretary Jesus Crispin Remulla, nagpakol na sa 18, 422 an kabilogang numero kan mga pinalayang PDLs.
Sinaysay man ni BuCor Director General Gregorio Catapang Jr. na sa masunod na taon, an mga PDL na nahatulan kan heinous crimes an kwalipikado para sa Good Conduct Time Allowance (GCTA), makalihis na sabihon kan Korte Suprema na igwang karapatan ining makinabang gikan sa nasambitan ng ley.
