Nagbaba sa 2.25 million an numero kan mga Pilipinong mayong trabaho o negosyo kan nakalihis na Nobiyembre kan nakalihiss na taon gikan sa 2.54 milyong nairehistro kan Oktubre 2025.
Basado sa pinakabagong labor force survey kan Philippine Statistics Authority (PSA), pigreport ni Undersecretary asin National Statistician Claire Dennis Mapa na nairehistro an 4.4% na unemployment rate kan Nobiyembre 2025, buot sabihon, nasa 44 gikan sa 1000 indibidwal na nasa labor force an mayong trabaho o negosyo sa nabanggit na panahon.
Mas halangkaw ini kun ikukumpara sa nairehistrong unemployment rate kan Nobiyembre 2024 na nasa 3.2% alagad mas hababa kun ikukumpara sa nairehsitrong 12% unemployment rate kan Oktubre 2025.
Tinukoy kan PSA Chief an nagkapirang mga sektor na nahilingan nin paglangkaw kan unemployment siring kan accommodation and food service siringman sa wholesale asin retail trade sectors.
Paliwanag ni USec. Mapa, matindi an nagin epekto sa duwang sektor an makukusog na bagyong Tino asin Uwan na tumama sa nasyon kan nakalihis na Nobiyembre kan nakalihis na taon na nagresulta sa pagkawara kan trabaho kan kabilugang 567,000 indibidwal.
Mientrastanto, pag abot man sa underemployed o mga obrero na may trabaho alagad naghahanap pa man nin extra jobs o extra work hours, bumaba ini sa 5.11 million kan Nobiyembre 2025. Mantang naglangkaw man an numero kan may trabaho o negosyo sa parehong period na nasa 49.26 milyong Pilipino.
