Naglangkaw an numero ka mga Pinoy na mayong trabaho kan Hulyo sa presenteng taon sigun sa Philippine Statistics Authority (PSA).
Sa press conference katakod sa Labor Force Survey results, pigreport ni PSA Undersecretary Dennis Mapa na naglangkaw nin 4.7% an unemployment rate o sa 2.38 million an numero kan mga mayon trabaho na edad 15 anyos palangkaw kan Hulyo.
Ini an mas halangkaw kumparar sa 1.62 million mayong trabaho kan Hunyo asin 2.29 million na naikurit kan Hulyo 2023. Pig-ugnay man kan PSA chief an paglangkaw kan nunero kan Hulyo sa kawaran nin trabaho sa mga jovenes sa edad 15 hasta 24 anyos kun saen kadakol nin fresh graduates gikan sa kolehiyo asin senior high school an dae nakahanap nin trabaho.
Mientrastanto, apwera digdi, ipinaliwanag man ni USec. Mapa na pirang mga sektor an naapektaran kan maraot na kamogtakan kan panahon na nagresulta sa mas hababang demand para sa trabaho. Siringman, piglalaoman soboot nan liwat mauswag an employment demand ngunyan na nagpuon na an ber months.
Pag-abot man sa underemployment rate, nasa 5.78 milyong Pilipino an nagpahayag nin pagmamawot na magkaigwa nin dugang na oras nin trabaho o magkaigwa nin sideline o mawot na magkaigwa nin bagong trabaho na may mas hahabang oras nin trabaho.
Sa ibong man kan mga Pinoy na igwa nin trabaho, nagbaba ini sa 47.70 million kan Hulyo gikan sa nairehistrong 50.28 million kan Hunyo. An 5 sub-sector na nag-ambag kan pinakahalangkaw na taunang pagbaba sa kabilogang numero kan mga may trabaho an sa manufacturing, professional, scientific asin technical activities, information and communication, mining and quarrying asin human health and social work activities.
