Nakisumaro man sa selebrasyon kan Eid’l Adha an Office of Civil Defense (OCD) sa pangengenot ni Defense Sec. Gilberto Teodoro.
Sa sarong pahayag, nagtao kan saiyang pagbati an sekretaryo sa mga Muslim Communities sa nasyon komo paggirumdom sa Feast of Sacrifice sa Islam.
Ipinagirumdom kan sekretaryo na an okasyon na ini an nagpapahiling nin makusog na pananampalataya, importansya kan sakripisyo asin magin an pagtatao nin serbisyo sa kapwa Pilipino.
Kasunod kaini, nangapudan man si Teodoro na sa selebrasyon kan Eid’l Adha, marahay na magsagibo nin pagninilay, pagtatarauhan asin pagpapakusog kan koneksyon sa pamilya asin magin komo parte kan komunidad.
Mientrastanto, nagpasalamat man si Teodoro sa mga Muslim na nasa serbisyo sa irarom kan kagawaran siringman sa Sandatahang Lakas ng Pilipinas na iyong nagtatrabaho para sa katuninungan asin pagmamantinir kan seguridad kan nasyon asin magin kan soberanya kan nasyon.
