Pigbubusol ngunyan kan Office of the Ombudsman an sistematikong mga lakdang asin reporma sa paglaban kaini kontra korapsyon.
Sa kinakahampang na isyu asin kontrobersiya kan nasyon sa urulay kan katiwalian, pigheras ni Ombudsman Remulla an planong mas pahiguton pa an mga lakdang kaining ginigibo.
Aminado kaya ini na an isyu kan korapsyon an dae maisasayumang literal na nakakagadan.
Ini an kasabay sa nagpapadagos pa man na pirang imbestigasyon sa maanomalyang flood control projects kan gobyerno.
Naisiwalat an korapsyon kan mga opisyal, kontratista asin iba pang imbwelto sa mga proyektong makakatabang kuta orog na sa oras kan kalamidad.
Kun kaya huli digde, pigsaysay ni Ombdusman Boying Remulla an nagkapira sa saindang mga stratehiyang mawot na makumpleto sa masunod na taong 2026.
Enot na an modernisasyon o ‘digitalization’ kan ahensya tangani gibuhong ‘integrated’ an mga sistema kaiba pati paggamit sa teknolohiya kan AI o Artificial Intelligence.
Mawot man ni Ombudsman Boying Remulla na pahiguton an pagpapakusog kan ‘transparency’ tangani makatabang sa nasyon asin gobyerno sa laban kontra korapsyon.
