NAGA CITY– Gadan an sarong Overseas Filipino Worker (OFW) mantang irido an tolong iba pa makalihis na aksidenteng mabangga kan nagtagilid na ford ranger an nakaparadang tricycle sa Tayabas City sa probinsiya kan Quezon.
Binisto an nagadan na si Irene Manguera, 36-anyos.
Sa nakuang impormasyon kan Bombo Radyo Naga, napag-araman na nakaparada sa gilid kan tinampo sa diversion road, Barangay Mayuwi an tricycle na minamaneho ni Angelito Cabael, 43-anyos kan nabanggaan kan ford ranger na minamaneho ni Giuseppe Aldrik Rikson Reyes, 24-anyos.
Sa inisyal na imbestigasyon kan PNP Tayabas City, nag-overtake suboot si Reyes sa sinundan kaining lunadan alagad bigla na sana ini mawaran nin kontrol sa manibela makalihis na iwasan an kasabatan na saro pang lunadan na naging kawsa kan pagtagilid kan ford ranger asin dagos na pagbangga kaini sa nakaparadang tricycle sa lugar.
Nairido sa manlaen-laeng parte kan lawas si Reyes siring man an tricycle driver na si Cabael, an mga pasahero kaini na sinda Manguera asin an sarong 6-anyos na aking lalaki.
Tolos man na dinalagan sa ospital an apat na biktima alagad binawian nin buhay mantang pigbubulong kan mga doktor si Manguera.
Sa ngunyan, nagpapadagos pa an imbestigasyon kan PNP-Tayabas City sa insidente mantang prinepreparar na an kasong ihahampang sa suspetsado.
