Nagsumiter nin surat an grupong TINDIG Pilipinas sa opisina kan Office of the Ombudsman partikularmente para ki Ombudsman Jesus Crispin ‘Boying’ Remulla.
Sa surat na ipinadara sa nasambitan ng opisyal, obheto kaining inkaminaron ini tangani aksyunan o imbestigaran an mga alegasyon nakapalaog sa articles of impeachment na pigsunad kontra ki Vice President Sara Duterte.
Marurumdumang dae nadagos an nilalaoman kutang ‘impeachment trial’ kontra sa Bise Presidente kan ma-archive an articles of impeachment.
Marurumduman man, na ini an idineklarang ‘unconstitutional’ o di’ naayon sa saligang batas kan iluwas kan Kataas-taasang Hukuman an desisyon kaini dapit sa impeachment. Kun kaya an grupong TINDIG Pilipinas, kaiba pati mga citizen-complainants an dumulog na sa bagong talagang Ombudsman tangani hilingon an sarong kadyat na imbestigasyon dapit sa mga alegasyon.
Huli digde, nanindugan an nasambitan ng grupo na dae dapat ipagsawarang bahala na sana an isyu asin alegasyon kinakahampang ni Vice President Sara Duterte. Kun kaya pigsierto man mismo ni Ombudsman Jesus Crispin ‘Boying’ Remulla na saiyang dae ipapasipara an mga alegasyon o isyu kan korapsyon pig aapon ki Bise Presidente Duterte.
Kasunod sa pagsusumiter kan surat kan TINDIG Pilipinas kan nakalihis na aldaw, sa saiyang opisina, pupuonan kaini an fact-finding. Sa surat kayang ipinadara sa saiya kan grupo pig inkaminar ninda an Ombdusman na tulos pupuonan an imbestigasyon sa Bise Presidente orog na mapadapit sa ‘articles of impeachment’ na pigsunad kontra sa saiya.
Saro an confidential and intelligence funds sa mawot nindang mapaimbestigaran o mapasuri sa Ombdusman alagad aminado si Remulla na kaipuhan pa muna kaining mabasa asin masuring marhay an surat. Siringpaman, pigheras ni Ombudsman Remulla na saiyang ikukunsiderar an ‘articles of impeachment’ komo giya sa isasagibong fact-finding.
