Pinagkokonsoderar ni Senadora Nancy Binay na blessing in disguise na dae na ini magigin parte kan impeachment trial laban ki Vice President Sara Duterte.
Huring termino na kaya ni Binay komo senador asin man gana komo alkalde kan Makati City sa katatapos sana na 2025 midterm elections.
Sa pulong balitaan, sinaysay ni Binay na kumporme ini na dae na magtindog na senator-judge sa paglilitis kontra sa bise presidente nin huli ta an proseso soboot kaini ay very divisive.
Posibleng sa Hulyo o paglaog man kan 20th Congress pupuonan an impeachment trial. Sa pagbubukas liwat kan sesyon sa Hunyo 2, ipiprisintar man kan prosecutors an articles of impeachment asin man aaprubaran man an revised rules of procedure kan impeachment trial.
Mientrastanto, sa Hunyo 3 magco-convene an Senado komo impeachment court. Asin man pag abot nin Hunyo 4 ay digde na papanumpaon an mga incumbent senator-judges.
Sigun ki Binay, an partisipasyon na sana ninda sa paglilitis iyo an pag-apruba kan rules na gagamiton kan impeachment court laban ki VP Sara.
Kan mahapot man si Binay kun dakula an tiyansa na ma-acquit si VP sara, soboot, dakulang epekto an bilangan nin boto orog na ta ngunyan na eleksyon kadakol sa mga kaalyado ni Duterte an nakalaog sa magic 12 senatorial race.
Enot digde, naipaaram na ni Senate President Francis “Chiz” Escudero ki House Speaker Martin Romualdez na andam na an Senado na akuon an House prosecution panel para sa pagbasa kan impeachment charges laban ki Duterte sa liwat na pagbubukas kan sesyon kan Kongreso sa Hunyo 2.
Sigun ki Escudero, sa masunod na aldaw, Hunyo 3, magco-convene an Senado komo sarong impeachment court tangani magluwas nin mga summons katakod sa paglilitis ki Duterte.
Inakusaran si Duterte nin panunuhol, katiwalian, korapsyon, asin man hayagang pagbalgar sa Konstitusyon katakod kan soboot salang paggamit nin milyun-milyong kantidad kan confidential funds kan Office of the Vice President asin man kan Department of Education, na saiyang pinamamayuhan magpuon taong 2022 hasta 2024
