Pormal nang nag arangkada kan nakalihis na aldaw nin Dominggo an overseas voting para sa 2025 National and Local Elections (NLE).
Sigun ki Commission on Elections (Comelec) Chairman George Erwin Garcia, an opisyal na overseas voting period ay nagpuon dakong alas-8:00 nin pagkaaga (local time), Abril 13.
Napagaraman na mahaloy an overseas voting hasta sa alas-7:00 nin pagkabanggi sa Mayo 12, na kasabay man kan pagtatapos nin panahon kan botohan sa nasyon. Susog sa Comelec, an test voting para sa registered overseas voters na nag-enrolled sa Online Voting and Counting System ay isinarado ganap na alas-11:59 nin pagkabanggi kan nakalihis na Sabado, Abril 12.
Kasunod kaini, tulos na man na pigpuonan an botohan. Sinabi kan poll chief na an pagboto kan mga kababayan sa 77 posts sa ibayong dagat ay idaraos sa paagi man kan internet voting.
Mientrastanto, an mga botante man sa 16 pang posts ay isasagibo sa paagi kan pagpasiring sa embahada o kaya man ay sa konsulada. Sigun pa kk Garcia, an internet voting abroad an bukas sa laog nin 24-oras.
Napagaraman na primerong makakaboto an mga rehistradong Filipino voters sa mga lugar sa New Zealand, sa irarom kan hurisdiksiyon kan Wellington Philippine Embassy, pag abot nin alas 4:00 nin pagkaaga sa Manila.
Enot nang sinabi ni Garcia na igwa nin 1.231 milyong Filipino voters sa ibayong dagat. Siringpaman, hasta kan nakalihis na aldaw nin Biyernes, Abril 11, nasa 48,000 botante pa sana an nagpa-enroll sa pre-voting enrollment system para sa 2025 polls.
Susog sa poll body, pwede pa man na mag-sign up an mga rehistradong Filipino overseas voters sa pre-voting enrollment para sa internet voting hasta sa Mayo 7.
