Dakulang hamon sa Bureau of Fisheries and Aquatic Resources Regional Office 5 (BFAR 5) an kinakahampang kan mga parasira sa banwaan nin Bulan, Sorsogon.
Sa intrevista kan Bombo Rasyo naga ki Wheng B. Briones, an Spokesperson kan BFAR- Bicol, kan nakalihis na Semana Santa, pansamantalang nagsara an mga Fish Processing Plant komo parte kan holiday break.
Segun ki Briones na sa Bulan, Sorsogon, anom na darakulang planta an nagsisirbing bulk buyers kan lawlaw o tamban. Amay na inabisuhan an mga parasira manungod sa pansamantalang pagpasara kan mga planta tanganing maibitaran an pagdakop nin sira kan mga parasira. Alagad sa ibong kan paabiso, kadakol man giraray an mga parasirang nagpalaot sa dagat rason kan pagdakul kan volume asin suplay mantang limitado an operasyon kan merkado.
An lawlaw sarong highly perishable na produkto, na ngangaipohan nin tulos na pagproseso o marhay na cold chain gikan sa pagdakop kan mga ini hasta satransportasyon tangnaing mamantiner an kalidad asin maibitaran an pagkaraot kan mga sira.
Base sa datus kan Philippine Fisheries Development Authority (PFDA), nagpakol sa poco mas o menos 60 tubs kada bangka an naideliver sa pantalan na kun sain nag-abot ini sa 200-300 na bangka kada aldaw kan nakalihis na semana.Nakipagkoordinar na si BFAR 5 Regional Director Ariel U. Pioquinto kan nakalihis na semana sa mga parasira, People’s Organizations, mga trader, asin kinatawan kan Philippine Fisheries Development Authority (PFDA)tanganing maaksyonan asin matawan nin kongkretong lakdang asin maibitaran an liwat napangyayari kan insidente.
Mientrastanto, an Philippine Fisheries Development Authority (PFDA) ice plant asin storage facilities nakatalaan na magpoon na mag-operate asin piglalaoman na masosulusyunan kaini an mga pangangaipohan kan mga parasira tanganing mamantiner an kalidad kan lawlaw o tamban asin mabawasan an pag-aaksaya kan mga sira orog na kun sobra an suplay.
