Nakatalaang puonan na kan Office of the Ombudsman ngunyan na semana an pagsasagibo nin preliminary investigation para sa nagkapirang mga kasong may kinaraman sa flood control projects anomaly.
Sigun mismo ki Ombdusman Jesus Crispin ‘Boying’ Remulla, nilalaoman na ini an saindang pupuonan partikularmente na sa anom na kaso katakod sa kontrobersyal na mga proyekto.
Ini soboot an mga flood control projects sa Oriental Mindoro kaiba man pati mga ‘ghost projects’ sa Bulacan.
Marurumduman na kan nakalihis na bulan, nagsumiter nin rekomendasyon an Independent Commission for Infrastructure sa Office of the Ombudsman tangani masunadan nin mga kasong kriminal sinda former Ako Bicol Party-list Rep. Zaldy Co, nagkapirang mga opisyales kan Department of Public Works and Highways asin pati kontratista.
Mantang kansuarin sana man isinumiter man kan Department of Jutstice sa Ombudsman an saindang ‘findings’ sa imbestigasyon dapit sa flood control projects. Kun kaya pigsierto ni Ombudsman Remulla an paggulong kan preliminary investigation sa saindang tanggapan.
Mientrastanto, aminado man si Ombudsman Boying Remulla na bako sana ini an mga kasong dapat pagtuunan asin man tawan nin pansin. Pati an urulay mapadapit sa ‘restitution’ an sayang mawot na matawan linaw o maipakarhay kun papano an gigibuhong proseso.
Makikipag ulay o makikipag-koordinar ini sa Sandiganbayan o Hudikatura huli ta pwede soboot ining magamit komo stratehiya kan gobyerno.
Apwera sa Sandiganbayan, mawot man ni Ombudsman na sumangguni sa Kataas-taasang Hukuman tangani makakua nin dugang na kaaraman sa urulay restitution asin kaso.
