NAGA CITY – Iniimbestigaran na kan mga otoridad an pagkawara kan P2 million kan sarong retiradong pulis sa Buhi, Camarines Sur.
Binisto an biktima na si retired Pol. Col. Napoleon Jutur Taduran, 56-anyos.
Sa entrevista kan Bombo Radyo Naga ki Pol. Capt. Efren Dela Cruz, hepe kan Buhi-Philippine National Police, sinabi kaini na ipigparada kan biktima an saiyang sakayan sa gilid kan tinampo kun sain yaon an kwarta na nakalaag sa sarong back pack antes na mag atindir sa kaaldawan kan saiyang kabarkada.
Maagahon na suboot kan makapuli an biktima asin duman na kaini narisa an pagkawara kan saiyang back pack laman an nasabit na cash na saiyang retirement benefits.
Kaiba pa igdi an saiyang wallet na may laman na P25,000 asin mga identification cards.
Segun ki Dela Cruz, pinili na darahon kan retiradong pulis an kwarta kesa walaton ini sa saiyang harong huli sa natatakot na posibleng malaog kan mga parahabon.
Napag-araman na kaka-withdraw pa sana kan biktima kan saiyang kwarta na hali pa sa Siyudad nin Naga antes nangyari an insidente.
