Pupuonan na an pagpapabakal kan P20 kada kilo kan bagas sa kadiwa stores sa Metro Manila asin mga kataid na probinsiya sa Mayo 13, sarong aldaw makalihis kan midterm elections.
Sigun ki Department of Agriculture (DA) Secretary Francisco Tiu Laurel Jr., siring kan saindang pigpromesa, ipagpapadagos an pagpapabakal kan baratong bagas makalihis an eleksiyon.
Paliwanag kan sekretaryo na paramientras pinagpaliban an pagpapabakal kan baratong bagast komo kasimbagan sa 10 aldaw na spending ban puon Mayo 2.
Enot na piglunsar an nasambitan ng programa sa Cebu City sa enot na parte kan Mayo asin inisyal na pigtalaan an anom na bulan na pilot implementation sa Visayas.
Alagad maski inisyal na nakatuon an programa sa Visayas, sinaysay kan DA Chief na pwede ining palawigon pa sa ibang mga rehiyon kaibahan an Metro Manila asin kataid na probinsiya sa paagi kan Kadiwa centers asin mga lokal na gobyerno na kaibahan sa national food crisis emergency initiative.
Kaibahan sa mga pwedeng makabakal nin baratong bagas iyo an vulnerable groups siring kan solo parents, persons with disabilities, senior citizens asin mga miyembros kan 4Ps.
Piglalaomang magbebenipisyo sa nasambitan ng programa an nasa 2 million households o 10 milyong Pilipino na madalagan hasta sa Disyembre na obhetong makapagtao nin abot-kaya asin magayon na klase kan bagas sa mga labi na nangangaipuhan.
