NAGA CITY- Pigheras kan alkalde kan siyudad nin Naga na igwa na soboot budget para sa pagpapakarhay kan JMR Coliseum.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na yaon na an 200 milyon na pondo para sa repair kan nasambitan ng Coliseum alagad dae pa muna papupuonan.
Sigun ki Robredo, mayor na pagpapakarhay kaya an gigibuhon sa JMR Coliseum kun saen babaguhon soboot digde an mga tukawan, salog kun saen gigubuhon nang flood resilient, mabugtak nin duwang set kan comfort room kabali na an sa taas.
Apwera digde, kaipuhan soboot na magkaigwa nin area para sa repacking asin pagluto para sa pag-akomodar kan pangangaipuhan kan mga evacuess enkso igwang kalamidad.
Katakod digde, naipresenter naman soboot sa opisyal an draft kan design asin magayon man ini.
An problema sana sigun pa sa alkalde an limitadong parking area sa lugar na sainda naman pighahanapan nin paagi na masimbagan.
Mientrastanto, apwera sa JMR Coliseum padagos man an paghanap nin pondo kan LGU-Naga para sa iba pang mga proyekto kan siyudad tanganing dagos-dagos an pagpapatrabaho sa mga ini.
Sa ngunyan, pigsierto na sana kan opisyal na yaon an saindang paglalapigot tanganing orog pang magin mauswag an siyudad nin Naga.
