Paglangkaw kan presyo kan gasolina sa masunod na semana, pwedeng ma-atubang kan mga motorista nin sa ibong kan pagsabi kan Department of Energy (DOE) na an iriwal sa Middle East na igwa sanang limitadong epekto sa suplay nin lana sa bilog na kinaban.
Sigon ki Rino Abad, direktor kan Oil Management Bureau kan DOE, sinaysay kaini na mayu man nin report nin danyos sa mga pasilidad sa produksyon nin lana sa Iran sa ibong kan mga pag-atake kan militar na konektado sa tensyon sa pag-ultanan kan Estados Unidos asin Israel.
Ipig-esplikar kaini na an mga target militar asin mga imprastraktura na may relasyon sa nuclear sana an tinamaan, asin na an kakayahan kan Middle East na magluwas nin lana dai naapektaran. Alagad, sinabi ni Abad na igwa nin paghadit an mga operator nin barko, na iyo an nagigin dahelan nin pagkaatraso sa mga paghatod nin lana.
Nin huli sa delay kan shipment, piglalaoman na malangkaw an presyo kan gasolina, diesel, asin kerosene puon saaga. Segun sa DOE, posibleng maglangkaw nin $5 sagkod $10 kada bariles an presyo kan lana sa global market.
Ini katumbas nin mga 30 sentimos kada litro para sa kada $1 na paglangkaw. Kun magpapadagos an paghiro kan presyo, mamamatian kan mga konsumidores an bilog na epekto sa laog nin duwa sagkod tolong semana, na an pagdugang kan presyo posibleng umabot sa P3 kada litro.
