NAGA CITY– Narekober sa harong kan sarong drug personality sa St. Vincent, Calauag sa syudad nin Naga an mga sachet nin pigtutubodang shabu na maabot sa 80 gramos asin may kantidad na P380,000.
Sa entevista kan Bombo Radyo Naga ki SPO2 Tobby Bongon, tagapagtaram kan Naga City Police Office (NCPO), sinaysay kaini na nagsagibo sinda nin operasyon kontra iligal na droga kaiba an pwersa kan Regional Philippine Drug Enforcement Unit (RPDEU)-5, CPDEU, Police Station 3, MIB 9th ID at Philippine Drug Enforcement Agency (PDEA)- Cam Sur sa nasambitan nang lugar laban sa suspek na si Rosemarie Devela, 25- anyos.
Huli digdi tolos na naaresto kan mga otoridad si Rosemarie kaiba an duwa kaining tugang na sinda Michael Devela, 37-anyos, asin Raymond Devela, 29-anyos, magtugang na sinda Jomalyn Tocyapao, 26-anyos, Judelyn Tocyapao, 23-anyos, na suboot mga drug surenderee asin an sarong menor de edad.
Sigun ki Bongon, haloy na nindang minamanmanan si Rosemarie na bistado komo supplier kan iligal na droga sa syudad nin Naga.
Apwera igdi, dati na man suboot nagsuko sa sinagibong oplan tokhang kan mga kapulisan an suspek alagad napag-aramang naglipat ini nin harong asin nagbwelta sa pagpabakal nin iligal na droga.
Nasa kustudiya na kan mga otoridad an mga suspek mantang pigpepreparar an isusunad na kasong pagbalgar sa RA 9165 o an Comprehensive Dangerous Drugs Act of 2002 an mga nadakop na suspek.
