Nagpaplano an administrasyong Marcos nin P44.58-bilyong alokasyon sa 2026 para sa imprastraktura kan edukasyon tangani masimbagan an backlog kan klasrums kan nasyon asin magbilog nin mga makabagong, climate-adaptive learning spaces.
Sinaysay ni Rolly Toledo, officer in charge sa Department of Budget and Management (DBM), na an pondo para sa imprastraktura kan edukasyon an “at the heart” kan record-high na proposed education budget na P1.38 trilyon para sa 2026.
Sa kabilugang ini, nakatalaang makakua nin P928.5 bilyon an Department of Education. Ini an basado sa National Expenditures Program (NEP) na isinumiter kan Malacañang, sa paagi kan DBM, sa Kongreso para sa deliberasyon.
Sigun ki Todelo, an bulto kan pondo an makriar nin 4,900 bagong klasrums asin papakarhayon an labi sa 9,400 sa bilog na nasyon. Siringman, an 2026 NEP an nagsusuhestyon na ibalik an labi sa sanggatos na mga mga heritage na establisyemento kan eskwelahan sa Gabaldon, o an mga pigtugdok kan panahon kan kolonyal na Amerikano, sa kantidad na P1.134 bilyon.
Mientrastanto, pondohan nin P3 bilyon an pagtutugdok nin 200 bagong “last mile” na mga eskwelahan sa mga lugar na nakasuhay sa heograpiya asin kulang sa serbisyo, kada saro an binugtakan nin solar power, water asin sanitation facility, asin angkop na kasangkapan.
Poco mas o menos P9.39 bilyon an gagamiton para i-rehabilitate, i-retrofit asin liwat na itugdok an 1,300 na mga eskwelahang naapektaran kan kalamidad—kabilugan labi sa 13,000 klasrums—sa irarom kan Infrastructure for Safer and Resilient Schools Project.
Dugang pa, an pigsuhestyong pambansang badyet an nagtatao nin kasangkapan para sa 18,000 klasrums; elektripikasyon para sa labi 400 eskwelahan asin 300 bagong pasilidad sa salud asin kalinigan. Iniladawan kaini an propwestong 2026 national budget komo “true education budget.”
An alokasyon kaini para sa edukasyon an nagrerepresenta sa 4 na porsyento nin gross domestic product, an pinakadakulang alokasyon para sa sektor.
