INAPROBARAN kan House of Representatives sa ikatolo asin huring pagbasa an prosopwestong P6.79 trillion 2026 national budget (House Bill 4058) kasuodma, Lunes, Oktubre 13.
Nakakua ini nin 287 boto pabor, 12 dae uyon, asin 2 abstention makalihis an deliberasyon puon kan nakalihis na Agosto 18.
Sigun ki Speaker Faustino “Bojie” Dy III, an pagpasar kan budget an patotoo kan pagtutok kan Kongreso sa reporma asin paninimbagan.
Prayoridad sa budget an edukasyon, pangsalud, agrikultura, asin serbisyong panlipunan alinsunod sa adbokasiya ni Presidente Ferdinand Marcos Jr.
Pangapodan ni Speaker Dy, dapat siertuhon kan mga lehislador an tapat asin marhay na paggamit kan pondo kan bayan.
Apwera sa national budget, inaprobaran man kan Kamarq an nagkapirang importanteng prosopwesto siring kan HB 4746 ( Franchise para sa Bohol Light Company, Inc.); HB 4757 (Sustainable Cities and Communities Act); HB 4745 (Last Mile Schools Act; HB 4744 (Private Basic Education Vouchers Assistance Act).
Liwat na mabweltada an sesyon kan Kamara sa Nobyembre 10, 2025, 3:00 PM. Mientrastanto, pigsierto ni House Appropriations Chair Rep. Mikaela Suansing na an 2026 national budget an kasimbagan sa tunay na pangangaipuhan kan mamamayang Pilipino.
P1.28 trilyon an pigtagama sa edukasyon na pinakadakula sa historya, lampas 4% global benchmark. Kaibahan digde an pondo para sa libreng kolehiyo sa irarom kan Universal Access to Quality Tertiary Education Act. P411.2 bilyon para sa pansalud, kaibahan an P113B para sa PhilHealth asin P49B sa zero-balance billing program para sa nagtitios.
P292.9 bilyon para sa agrikultura, kaibahan an P10B ayuda para sa mga paraoma asin parasira, P74.5B para sa farm-to-market roads asin irigasyon, asin P30B para sa makinarya.
An dugang na pondo an gikan sa hinaling P255B flood control projects.
Sigun ki Suansing, mayo na nin Infrastructure projects na pwedeng pondohan gikan sa mga unprogrammed appropriations apwera na sana kun igwang dugang na kita an gobyerno.
Ipinagiromdom man kaini na bakong parte kan national budget an unprogrammed appropriations asin dae ini otomatikong mapopondohan.
Dugang pa ni Suansing, nagin mas bukas asin tapat an proseso kan pag-urulay sa budget sa paagi kan pagjali sa small committee, pakikipag-koordinar sa mga civil society groups asin pagsunod sa constitutional process kan pag-aamyenda antes an ikaduwang pagbasa.
