NAGA CITY-Kumpiskado ang nasa P8.2-M na halaga ng iligal na droga mula sa tatlong drug personality sa isinagawang buybust operation sa C5, Barangay Mabolo, Naga City.
Kinilala ang mga suspek na sina John Carlo Paycana, 22-anyos; Jamel Daligdig, 24-anyos; at Sobranel Paycana, 39-anyos, pawang mga residente ng B5 L34 PH1 Lakeside East Banaybanay Cabuyao, Laguna.
Sa nakalap na impormasyon ng Bombo Radyo Naga sa Naga City Police Office napag-alaman na naaktuhan ng mga otoridad ang mga suspek na nagbebenta ng iligal na droga matapos na makumpiska mula kay Daligdig ang labing-isang piraso ng knot tied transparent plastic sachet ng pinaghihinalaang shabu habang nakuha naman ng tig-isang piraso ng heat sealed transparent plastic sachet ng shabu kila Sobranel at John Carlo Paycana.
Sa inisyal na imbestigasyon pa ng mga otoridad, tinatayang mayroong bigat na aabot sa nasa 1,210 grams ang mga nasamsam na iligal na droga at nagkakahalaga ng nasa P8,228,000.
Sa ngayon, nasa kustodiya na ng mga otoridad ang mga naturang suspek para sa karampatang kaparusahan.
