Nasabat kan Department of Agriculture (DA) asin Bureau of Customs (BOC) an apat na container van kan smuggled na asukas gikan sa Thailand asin Vietnam na nakakantidad nin poco mas o menos P9 million.
Sigun ki DA Secretary Francisco Tiu Laurel Jr, mayong kaukulang permit gikan sa Sugar Regulatory Administration (SRA) an importer na Lapaz Multi-Purpose Cooperative gikan sa Roxas City.
Mientrastanto duwa pang container na gikan man sa Vietnam an pigdeklarar komo “sweetener mix” alagad nagluwas sa pagsusuri na refined sugar man ini na pwedeng magpalugi sa gobyerno nin P1.8 million na buwis.
Dugang pa digde, nasabat man an smuggled na sigarilyo na nagkakantidad nin P90 million gikan sa China na pwedeng makaapektar sa kabuhayan kan mga paraomang nagtatanom nin tabako.
Sa record kan DA, nag-abot sa P2.83 billion an kantidad kan mga nakumpiskar na smuggled na farm goods kan nakalihis na taon mantang nasa P407.6 million man an nasabat puon Enero hasta Mayo 19 kan taong ini.
Sa sarong entrevista ki SRA Administrator Pablo Luis Azcona sinaysay kaini na pwedeng iheras an mga nakumpiskar nindang mga asukar pasiring sa mga Kadiwa Store na nakatalaga sa nasyon.
