Kaiba si eight-division world champion Manny Pacquiao sa listahan kan mga nominado para sa prestihiyosong International Boxing Hall of Fame.
Sa report na pinaluwas kan The Ring, an kampeon na Pinoy an saro sa mga nominado para sa siring na onra na itatao sa masunod na taon. Sikat na marhay an pangaran ni Pacquiao huli sa saiyang dakulang kontribusyon sa kinaban nin boksing.
Kaiba pa an halabang listahan kan trayumpo kaini tanganing magin karapat-dapat na mapabali sa Hall of Fame.
Si Pacquiao an solamenteng boksingero sa kinaban na igwa nin world title sa walong manlaen-laen na dibisyon.
Nagkampeon ini sa flyweight, super bantamweight, featherweight, super featherweight, lightweight, light welterweight, welterweight asin light middleweight. An nagkapira sa mga bantog na boksingero na nadaog kaini iyo sinda Erik Morales, Marco Antonio Barrera, Juan Manuel Marquez, Oscar dela Hoya, Ricky Hatton, Antonio Margarito asin Shane Mosley.
Naatubang man kaini si Brandon Rios, Bradley, Chris Algieri asin an dai pa nadaog na Amerikanong paralaban na si Floyd Mayweather, Jr. Sa saindang laban ni Mayweather na tinawag na ‘Fight of the Century’ kan 2015 an dae pigpalad na makua ni Pacquiao an piglalaoman na kapangganahan.
