NAGA CITY- Arestado an sarong padre de pamilya makalihis na mabudalan kan saiyang pigmamanehong behikulo an sarong indibidwal sa kalabaan kan tinampo sa Bondoc Peninsula Road sa Barangay Amontay, Pitogo, Quezon.
Binisto an suspek na si Arnold Oribiana, 54-anyos.
Basado sa impormasyon gikan sa Pitogo-PNP, pigmamaneho ni Oribiana an sarong Mitsubishi L300 Exceed 2.5 na nakarehistro sa sarong punerarya, mag-uumagahon kasuudma kan aksidente kaining mabudalan an dae pa nabibistong biktima na naglalakaw sa toong parte kan tinampo.
Pigsasabing nakubanan si Oribiana sa headlight kan papaabuton man na behikulo gikan sa suway na direksyon kun kaya nangyari an insidente.
Tulos man niyang ipiglunad sa saiyang pigmamanehong behikulo an biktima tangani na idalagan sa ospital alagad idineklarar ining dead on arrival kan mga doktor.
Sa ngonian, nagpapadagos pa an imbestigasyon kan Pitogo-PNP sa suspek na sasangatan nin Reckless Imprudence Resulting to Homicide.
